Iniciativa pol Asturianu recordó que la toponimia tradicional del conceyu ye oficial dende 2009
07 may 2024 . Actualizado a las 16:49 h.L'asociación Iniciativa pol Asturianu denunció qu'un vecín d'El Poliar (Mieres) acudió a la Comisaría del conceyu pa camudar el DNI y nun-y permitieron usar la toponimia oficial del so llugar.
Asina, según espliquen al traviés de nota de prensa, cuando solicitó que nel documentu apaeciere'l topónimu oficial del so llugar de residencia, la funcionaria que lu atendía respondió que nun yera posible porque'l decretu d'oficialización namás ta espublizáu nel BOPA, que ye d'ámbitu autonómicu, y non nel BOE, d'ámbitu estatal.
El personal de la comisaría, esplicaron, treslladó-y tamién que namás podríen incluyir el topónimu oficial El Poliar si'l ciudadanu aporta una partida de nacimientu o una disposición del BOE.
Iniciativa pol Asturianu recordó que la toponimia tradicional de Mieres ye oficial dende 2009 y va treslladar esta problemática a la Conseyería de Cultura, Política Llingüística y Deporte pa recordar a la Delegación de Gobiernu y a la Policía Nacional la validez llegal de la toponimia oficial y a reclamar l'adaptación de los sistemes informáticos pa que los nomes tradicionales de los pueblos apaezan en tolos formularios y documentos; informó Europa Press.